دھندا !!!

شام کے ملگجے اندھیرے میں
صاف سُتھری سڑک کے دونوں طرف
اپنے دھندے پہ آ نکلتی ہیں
اور گاہک تلاش کرتی ہیں

کُچھ نئی کُچھ ذرا پُرانی سی
( وقت کی نوک پہ یا ڈھلواں پہ )

صاف سُتھری سی، خُوشبُوؤں میں بسی
( مارکیٹ میں نئی نئی اُتری )

گندی میلی سی، ٹُوٹی پُھوٹی سی
( سینکڑوں گاہکوں کو جھیلے ہوئے )

شام کے ملگجے اندھرے میں
اپنے دھندے پہ آ نکلتی ہیں
اور گاہک تلاش کرتی ہیں
ٹیکسیاں بھی عجیب ہوتی ہیں

ثمینہ تبسم